اسلام آباد (نیوز ڈیسک ) وفاقی وزیر داخلہ رانا ثناءاللّٰہ آئی ایس آئی کے شہید ڈائریکٹر نوید صادق کے گھر پہنچے اور شہید کی اہلیہ، صاحبزادی اور لواحقین سے ملاقات کی۔ وزیر داخلہ نے نوید صادق کے اہلخانہ سے اظہار ہمدردی کرتے ہوئے شہید کے لیے فاتحہ خوانی کی۔ انہوں نے شہید نوید صادق کی پاکستان کے لیے خدمات پر خراج عقیدت پیش کیا۔ اس موقع پر رانا ثناءاللّٰہ نے کہا کہ ہمارے شہدا نے وطن عزیز کی سلامتی اور دفاع کے لیے ناقابلِ فراموش قربانیاں دی ہیں۔ ان کا کہنا تھا کہ نوید صادق نے ملک میں دہشتگردی کے خاتمے کے لیے مثالی خدمات انجام دیں۔ وفاقی وزیر داخلہ نے مزید کہا کہ نوید صادق شہید کی قومی خدمات پر پوری قوم کو فخر ہے۔