بھوپال (نیوز ڈیسک ) بھارتی ریاست مدھیہ پردیش کے ضلع ریوا میں 16 سالہ لڑکے نے مبینہ طور پر ایک 58 سالہ خاتون کی عصمت دری کی اور اس کا گلا گھونٹ کر اسے بے دردی سے مار ڈالا، یہ افسوسناک واقعہ مبینہ طور پر دو سال قبل موبائل فون کی چوری کے واقعے کا شاخسانہ ہے.
این ڈی ٹی وی کے مطابق یہ واقعہ 30 جنوری کی رات ہنومان پولیس سٹیشن حدود کے گاؤں کیلاش پوری میں پیش آیا۔ لڑکے نے مبینہ طور پر خاتون کے منہ میں پلاسٹک کا بیگ اور کپڑا بھرا، اسے گھسیٹتے ہوئے عمارت کے زیر تعمیر حصے میں لے گیا جہاں وہ رہتی تھی، اس کے سر اور جسم کے دیگر حصوں پر درانتی سے وار کیا اور اس کے پرائیویٹ پارٹس پر بھی تشدد کیا۔
پولیس کے مطابق خاتون کے اہل خانہ نے لڑکے پر دو سال قبل موبائل فون چوری کرنے کا الزام لگایا تھا اور لڑکا اس کا بدلہ لینا چاہتا تھا۔ ایڈیشنل سپرنٹنڈنٹ آف پولیس (اے ایس پی) وویک لال نے کہا کہ یکم فروری کو ایک اطلاع ملی تھی کہ ایک 58 سالہ خاتون کی لاش زیر تعمیر عمارت میں پڑی ہے۔
انہوں نے کہا کہ پولیس اور فرانزک ٹیم موقع پر پہنچی اور پتہ چلا کہ خاتون کو کسی نامعلوم شخص نے بے دردی سے قتل کیا ہے۔ مخبروں کی اطلاع اور تفتیش کی بنیاد پر پولیس نے اس کے پڑوس میں رہنے والے لڑکے کو شامل تفتیش کیا جس نے جرم کا اعتراف کرلیا.