نئی دہلی (نیوز ڈیسک ) ممبئی کے شہری شنکر مشرا جس نے نومبر میں ایئر انڈیا کی پرواز میں ایک بزرگ خاتون پر پیشاب کیا تھا، کو اس کی کمپنی ویلز فارگو نے برطرف کر دیا ہے۔ کمپنی نے کہا ہے کہ 34 سالہ شنکر مشرا کے خلاف الزامات انتہائی پریشان کن ہیں۔ کمپنی نے آج شام ایک بیان میں کہا، ‘ویلز فارگو ملازمین کو پیشہ ورانہ اور ذاتی رویے کے اعلیٰ معیار پر رکھتا ہے اور ہمیں یہ الزامات بہت پریشان کن معلوم ہوتے ہیں۔ اس فرد کو ویلز فارگو سے برطرف کر دیا گیا ہے۔ این ڈی ٹی وی کے مطابق شنکر مشرا لاپتہ ہے اور اس کی تلاش کے لیے تلاشی نوٹس یا ایئر پورٹ الرٹ جاری کر دیا گیا ہے۔
خیال رہے کہ 26 نومبر کو نیویارک سے دہلی ایئر انڈیا کی فلائٹ میں شنکر مشرا نے مبینہ طور پر اپنی پتلون کی زپ کھول کر بزنس کلاس میں ایک خاتون پر پیشاب کر دیا۔ بعد میں اس نے خاتون سے درخواست کی کہ وہ اسے پولیس میں رپورٹ نہ کرے، یہ کہتے ہوئے کہ اس سے اس کی بیوی اور بچے پر اثر پڑے گا۔